Israel Ilunde ni mwanzilishi na Mkurugenzi Mtendaji wa The Youth Partnership Countrywide (YPC), Shirika la Kiraia linalofanya kazi katika kuwawezesha vijana wa kike na wa kiume katika masuala ya uraia na uchumi kupitia mafunzo katika utawala na ujasiriamali, midahalo, uhamasishaji, na uzoefu wa kazi za hiari. Bwana Ilunde kama Mtendaji Mkuu wa YPC amefanikisha na kusimamia kwa kina na kwa ujumla kubuni miradi, mipango, uhamasishaji wa rasilimali, utekelezaji, ufuatiliaji, ujifunzaji, na tathmini ya shughuli zote za YPC pamoja na kujenga ushirikiano na miradi ya pamoja.

Judith Urio ni Mkuu wa Idara ya Vijana kutoka shirika la UNA na ni Mratibu wa Jukwaa la Maendeleo Endelevu Tanzania (TSDP), linalounganisha zaidi ya asasi 500 za kiraia ili kuendeleza utekelezaji, ufuatiliaji na utoaji wa taarifa kuhusu Malengo ya Maendeleo Endelevu (SDGs). Aliongoza uandaaji wa Taarifa ya Mapitio ya Kitaifa ya Hiari ya Asasi za Kiraia ya mwaka 2023, akihakikisha mitazamo ya wananchi wa ngazi za chini na mashirika ya kiraia inawakilishwa katika ngazi ya kitaifa na kimataifa.

Akitambulika kama mtaalamu wa utekelezaji na utoaji wa taarifa za SDGs, Judith pia ni kiongozi kijana anayefanya uchechemuzi wa haki za kiuchumi na ushirikishwaji katika maamuzi. Ana Shahada ya Kwanza ya Mahusiano ya Kimataifa na Diplomasia.

Semkae Kilonzo ni Mkurugenzi Mtendaji wa Policy Forum, mtandao wa mashirika 62 ya asasi za kiraia za Tanzania unaolenga kuimarisha utawala bora na matumizi yenye uwajibikaji ya rasilimali za umma kwa kujenga uwezo wa wadau wa kiraia kushawishi na kufuatilia utekelezaji wa sera, pamoja na kuimarisha mwitikio wa serikali kwa ajenda ya utetezi ya asasi za kiraia inayohusu matumizi yenye uwajibikaji ya rasilimali za umma.

Semkae ana uzoefu mkubwa katika kazi za utetezi wa sera akiwa na asasi za kiraia nchini Tanzania, na ana shauku ya kupambana na mtiririko haramu wa fedha hususan katika sekta ya uziduaji, pamoja na kuhakikisha usimamizi wa mapato yatokanayo na rasilimali asilia unawanufaisha wananchi kupitia ushirikiano wa kimkakati kati ya serikali, sekta binafsi na jamii.

Semkae ana shahada ya uzamili (Masters) katika Uandishi wa Habari na Masomo ya Vyombo vya Habari kutoka Chuo Kikuu cha Cardiff, Uingereza, na alipata mafunzo yake ya awali ya uandishi wa habari nchini Ireland (Dublin) na katika Chuo cha Uandishi wa Habari cha Tanzania. Pia ni mhitimu wa kozi ya Misingi ya Ufuatiliaji wa Uwajibikaji wa Huduma za Umma (Fundamentals of Social Accountability Monitoring Course) ya Public Service Accountability Monitor (PSAM) katika Chuo Kikuu cha Rhodes, Afrika Kusini.

Aidha, Semkae ni mwanzilishi mwenza na mjumbe wa Bodi ya Hakirasilimali, jukwaa la asasi za kiraia linalofanya kazi kwenye masuala ya kimkakati yanayohusu uchimbaji wa madini, mafuta na gesi nchini Tanzania

Frank Girabi ni Mtaalamu wa Usimamizi wa Programu mwenye uzoefu wa zaidi ya miaka 18 katika kufanya kazi na mashirika mbalimbali ya kijamii na mashirika ya kimataifa katika utekelezaji wa mipango mkakati, usanifu na utekelezaji wa programu za elimu, vijana, na sera, zinazokuza njia zinazozingatia haki za kuwezesha jamii zilizo hatarini, kukuza ajira endelevu, ushiriki, uwajibikaji wa kijamii, ujumuishaji wa kijamii, na haki. Bwana Girabi ana shauku ya kushughulikia ukosefu wa haki ya umasikini kwa kiwango cha kimataifa na ni mwanzilishi wa Ripple Development Initiative – RDI, shirika lisilo la kiserikali linalojishughulisha na maendeleo ya jamii. Pia ni mwanachama muhimu wa timu ya usimamizi ya VSO - Tanzania na ana shahada ya uzamili katika Tathmini na Usimamizi wa Rasilimali Asili.

Ndugu Terry ni mtaalamu wa Biashara ya Kilimo na Mtaalamu wa Sayansi ya Chakula mwenye uzoefu wa zaidi ya miaka kumi na mitano, akifanya kazi zaidi na mashirika ya wanachama ya ngazi ya juu, yakiwemo Baraza la Nafaka Afrika Mashariki (EAGC), Baraza la Mchele Tanzania (RCT), Mtandao wa Mimea Jamii ya Kunde Tanzania (TPN), Mtandao wa Vikundi vya Wakulima Wadogo Tanzania (MVIWATA) na Chama cha wasindikaji wa bidhaa za maziwa Tanzania  (TAMPA). Ana uzoefu mpana katika masuala yanayohusiana na kukuza mifumo rasmi ya biashara na kuunda mazingira wezeshi ya biashara kwa wakulima wadogo na makampuni ya biashara ya kilimo. Katika muda wake wote wa kazi, Bw. Terry amekuwa mtaalamu muhimu katika kuboresha mifumo rasmi ya biashara na kutekeleza programu za maendeleo ya kilimo, zenye lengo la kufungua fursa kwa biashara ndogo na za kati kukua na hatimaye kuchangia katika kuongeza pato la taifa. Ana uhusiano mzuri wa kikazi na wadau mbalimbali wa kilimo, kuanzia viongozi wa juu wa serikali hadi wakulima wadogo vijijini.

Bw. Terry pia ana uzoefu mzuri wa biashara ya kilimo na watoa huduma katika Kanda ya Afrika Mashariki na kwingineko. Amehusika katika miradi kadhaa ya kitaifa ya kukuza minyororo ya thamani ya Alizeti, Kunde, Soya na Nafaka nchini Tanzania. Katika maendeleo ya taaluma yake, Bw. Terry amejijengea uzoefu mkubwa katika kusimamia miradi inayofadhiliwa na wafadhili, ikiwemo USAID, USDA, UKAID, EU, SIDA, Rikolto, FAO, ITC na AGRA.

Gwamaka ana uzoefu wa zaidi ya miaka 19 katika usimamizi wa maendeleo, akifanya kazi na mashirika ya kiraia ya ndani na kimataifa nchini Tanzania kwa kuratibu programu mbalimbali za maisha katika sekta tofauti; Usimamizi wa Maliasili, usimamizi wa migogoro na kuishi kwa amani kati ya dini mbalimbali. Ana uzoefu mkubwa katika kuwezesha ujenzi wa uwezo wa taasisi na mashirika, uchambuzi wa sera, ushawishi na mawasiliano.

Gwamaka ana historia nzuri katika kuwezesha biashara za kilimo, uanzishaji wa vyama vya ushirika na asasi zingine, na anazingatia kufanya shughuli hizo kwa uwazi, uwajibikaji na uendeshaji kama biashara kwa ajili ya uendelevu. Gwamaka ana Shahada ya Uzamili katika Maendeleo ya Uchumi ya Jamii kutoka Chuo Kikuu cha Southern New Hampshire na elimu ya awali alipata katika Taasisi ya Mafunzo ya Ustawi wa Jamii ya Taifa jijini Dar es Salaam.

Gwamaka anavutiwa na masuala yanayohusiana na kujenga uimara wa jamii, uwajibikaji, na ukuaji jumuishi. Pia ni mwanafunzi wa zamani wa kituo cha Rhodes University kinachoshughulikia Ufuatiliaji wa Uwajibikaji wa Huduma za Umma (PSAM). Gwamaka kwa sasa anafanya kazi katika Norwegian Church Aid kama Meneja wa Uhamasishaji na Ushirikiano.